Prezantohet Strategjia 2025–2027 për edukimin e publikut kundër Pastrimit të Parave, pjesë e tryezës së diskutimit dhe kryetari i DHTIT-së, z.Jaka
Dhoma e Tregtisë dhe Industrisë, Tiranë në bashkëpunim me Agjencisë e Inteligjencës Financiare (AIF) dhe me Lëvizjen Evropiane në Shqipëri (EMA) zhvilluan një tryezë diskutimi mbi “Strategjinë e edukimit të publikut mbi rrezikun që mbart në shoqërinë tonë pastrimi i parave dhe financimi i terrorizmit 2025–2027”.
Të pranishëm në këtë takim ishin kryetari i DHTIT-së, z.Nikolin Jaka; Drejtori i Përgjithshëm i AIF, Z. Ervin Koçi; Gledis Gjipali, Drejtor ekzekutiv i EMA; Drejtori i Përputhshmërisë pranë AIF, Z. Agim Muslia; Eksperti sllovak në fushën e parandalimit të pastrimit të parave Z. Andrej Leontiev.
Në fjalën e tij, z. Jaka, theksoi rëndësinë e përmirësimit të standardeve të biznesit shqiptar si një element kyç në parandalimin e pastrimit të parave dhe në kontributin ndaj luftës kundër këtij fenomeni. Ai u shpreh se ka ardhur momenti që sipërmarrja shqiptare të ndërgjegjësohet, të jetë më aktive dhe të investojë seriozisht si në zhvillimin e burimeve njerëzore, ashtu edhe në teknologji, për të ndërtuar një klimë biznesi të ndershme, transparente dhe të qëndrueshme.
Nga ana tjetër, Drejtori i Përgjithshëm i AIF, z. Ervin Koçi, theksoi se lufta kundër pastrimit të parave dhe financimit të terrorizmit nuk mund të përballohet në mënyrë të njëanshme. Ai nënvizoi domosdoshmërinë e një bashkëpunimi të ngushtë me sektorin privat, institucionet akademike dhe aktorët e shoqërisë civile, si elementë thelbësorë në këtë përpjekje të përbashkët.
Takimi u mbyll me dakordësinë e palëve për të forcuar bashkëpunimin institucional dhe për të promovuar një kulturë të qëndrueshme transparence, integriteti dhe ndërgjegjësimi shoqëror në luftën kundër pastrimit të parave dhe financimit të terrorizmit.
