Nënshkruhet memorandum bashkëpunimi! Delegacioni i biznesit nga Tirana, me në krye z.Jaka pritet në takim nga Dhoma e Kosturit
Një delegacion biznesi nga Tirana, me në krye kryetarin e Dhomës së Tregtisë dhe Industrisë, Tiranë, z.Nikolin Jaka u prit në një vizitë zyrtare nga Dhoma e Kosturit, Greqi.
Takimi u zhvillua në një atmosferë miqësore dhe konstruktive, me fokus të veçantë krijimin e urave të bashkëpunimit në fusha me interes të përbashkët si turizmi, promovimi i produkteve dhe shërbimeve lokale, pjesëmarrja në projekte të përbashkëta në kuadër të programeve evropiane, si dhe organizimi i takimeve B2B për të lehtësuar shkëmbimin e përvojave dhe forcimin e partneriteteve ndërmjet bizneseve.
Një moment kyç i këtij takimi ishte nënshkrimi i një Memorandumi Bashkëpunimi midis dy Dhomave.
Dy kryetarët, z. Nikolin Jaka dhe z. Karataglidis Charalampos theksuan njëzëri se ky memorandum synon krijimin e një partneriteti strategjik për të nxitur zhvillimin ekonomik të ndërsjellë, përmirësimin e komunikimit ndërmjet komuniteteve të biznesit të dy vendeve, si dhe forcimin e bashkëpunimit ndërkufitar.
Në vijim të këtij bashkëpunimi, palët ranë dakord që gjatë vjeshtës të organizohet një forum biznesi në Tiranë, me qëllim fuqizimin e lidhjeve ekonomike dhe krijimin e mundësive konkrete për partneritete ndërmjet bizneseve të të dy vendeve.
