Me ftesë nga ambasada kineze, kryetari i DHTIT-së Nikolin Jaka pritet në takim nga ambasadorja Pang Chunxue
Me ftesë të ambasadës së Republikës popullore të Kinës, kryetari i Dhomës së Tregtisë dhe Industrisë, Tiranë, z.Nikolin Jaka u prit nga ambasadorja e jashtëzakonshme dhe fuqiplotë e R.P të Kinës, znj. Pang Chunxue. Në fokus së këtij takimi ishte krijimi i mundësive dhe urave të bashkëpunimit ekonomik dhe tregtar mes 2 vendeve. I pranishëm në takim, ishte dhe ambasadori i jashtëzakonshëm dhe fuqiplotë i Shqipërisë në Kinë, z.Riza Poda.
Në fjalën e tij, kryetari i DHTIT-së, z.Jaka vuri theksin se Kina është partneri i dytë tregtar më i rëndësishëm për Shqipërinë, ku evidentohen edhe investimet kineze në sektorët e energjisë, infrastrukturë dhe në shfrytëzimin e pasurive natyrore etj. Z.Jaka theksoi se kompanitë kineze vijojnë të shfaqin një interes të shtuar për të investuar në vendin tonë, duke sugjeruar si fusha me potencial investimi në energjinë e rinovueshme me panele fotovoltaike të prodhuara nga Kina, si edhe prezenca e shtuar e automjeteve elektrike nga Kina.
Gjithashtu, kryetari i DHTIT-së shprehu interes për mundësitë e hapjes së tregut në Kinë për eksport të produkteve ushqimore nga Shqipëria si mjalti, bulmetet, vaji i ullirit etj.
Një pikë tjetër shumë e rëndësishme e bisedës nga Z.Jaka ishte shprehja e interesit mbi nevojat për kapital human që Shqipëria po përjeton përgjatë viteve të fundit. Për rrjedhojë, në këtë takim u diskutua edhe mundësia e sigurimit të punonjësve nga Kina në industrinë prodhuese vendase.
Z.Jaka shprehu interes edhe për zhvillimin e një forumi biznesi në Kinë dhe krijimin e mundësisë për sipërmarrjen shqiptare për pjesëmarrje në panaire dhe ekspozita tregtare në Kinë.
Në përgjigje të interesit të kryetarit të Dhomës së Tregtisë, këshilltari ekonomik i ambasadës së Kinës u shpreh i gatshëm për ofrimin e urave të komunikimit për pjesëmarrje në panairin e madh “Guangzhou”, i cili mbahet në 2 periudha, 15 prill-5 maj si edhe në shtator të 2025.
Në fund të takimit, Z.Jaka u siguroi të pranishmëve gatishmërinë e Dhomës së Tregtisë dhe Industrisë, Tiranë për t’iu ardhur në ndihmë me konsulencë ligjore ose asistencë çdo biznesi kinez që kërkon të investojë në vendin tonë.
