Kryetari Jaka pret në takim Unionin e Afaristëve “Vizioni për Preshevën, Medvegjën dhe Bujanocin”

Kreu i Dhomës së Tregtisë dhe Industrisë Tiranë, z.Nikolin Jaka priti në një takim Unionin e Afaristëve “Vizioni për Preshevën, Medvegjën dhe Bujanocin”, i përbërë nga kryetari Xhelal Memeti dhe dy përfaqësues të tij.

Diskutimet u përqendruan te nevoja për mbështetje dhe nxitje e biznesit lokal në Preshevë, Medvegjë dhe Bujanoc; rëndësia e një plani zhvillimor për përmirësimin e mundësive reale drejt zhvillimit të qëndrueshëm ekonomik lokal; shtimi i aktiviteteve ekonomike në bujqësi e blegtori; promovimi i produkteve në tregjet rajonale e ndërkombëtare dhe mundësitë për ta bërë më atraktiv agrobiznesin në këto tre komuna.

Me qëllim hapjen e perspektivave të reja zhvillimore, u ndanë pikat kyçe të mbështetjes përmes përfshirjes në projekte të përbashkëta, trajnimeve, ku DHTIT shprehu angazhimin për të dhënë ndihmën e saj, organizimit të një forumi ekonomik mbarëshqiptar, panaireve etj.

Të pranishëm në këtë takim ishin edhe zv.ministri për Evropën dhe Punët e Jashtme, z.Besart Kadia, Kryetari i Këshillit të Agrobiznesit, z.Agim Rrapaj, Drejtorja e Diplomacisë Ekonomike, znj. Silvana Leskaj dhe z.Gjokë Uldedaj, anëtar i Asamblesë së DHTIT.