Kryetari Jaka në Samitin e Prizrenit për Arsimin dhe Aftësimin Profesional: Nuk na duhet retorika, misioni ynë është të kemi njerëz të kualifikuar që të punojnë kudo

Kryetari i Dhomës së Tregtisë dhe Industrisë Tiranë, zoti Nikolin Jaka u bë pjesë e Samitit të Arsimit dhe Aftësimit Profesional-VET Samit, që po mbahet në Prizren sot me 29 qershor 2021.

Si pjesë e panelit të diskutimit, kreu i Dhomës së Tiranës, u shpreh ndër të tjera se “burimet njerëzore duhet të jenë të kualifikuara dhe të punojnë në Kosovë, Shqipëri apo Maqedoni dhe nëse ne nuk e bëjmë këtë, atëherë nuk bëjmë gjë tjetër veçse retorikë dhe unë nuk do të doja kurrë që kjo konferencë e jashtëzakonshme të mos e realizojë këtë mision.

“Në misionin e çdo institucioni arsimor, sfida kryesore për edukimin e brezit të ri është jo vetëm formimi i tyre profesional dhe akademik, por përshtatja e tyre me nevojat e tregut  të punës”, u shpreh ai.

“Për ne sipërmarrësit, gjithnjë e më shumë po bëhet e qartë  se epërsia konkurruese e një firme, vjen nga aftësia sipërmarrëse, nga njohuritë menaxheriale dhe teknike. Sot në vendet e zhvilluara industritë e bazuara në njohuri  po zgjerohen me shpejtësi, ku teknologjitë e reja që prezantohen kushtëzohen  me rritjen e kërkesave për punonjës  me nivel kualifikimi të lartë”, vlerësoi Jaka.

Për kryetarin e DHTIT sektori privat dhe përfaqësuesit e tyre, si dhomat e tregtisë dhe industrisë, kane dhe duhet të luajnë një rol kyç në formimin profesional, për zhvillimin e standardeve të trajnimit, organizimin e kurseve të kualifikimit etj.

Në panelin ku merrte pjesë Kryetari i DHTIT ishin gjithashtu, Arbërie Nagavci nga Ministria e Arsimit, Shkencës, Teknologjisë dhe Inovacionit të Kosovës, Jan-Axel Voss – Zëvendës ambasadori i Gjermanisë në Kosovë, Matthew Cullinane – Zyrtar i Sektorit Private në USAID/ Zyra e Zhvillimit Ekonomik të Kosovës, Ambasada Amerikane/ USAID; Katrin Ochsenbein – Udhëheqëse e Zyrës së Ekonomisë dhe Punësimit, Ambasada e Zvicrës si dh Nebi Hoxha – Kryetar i Odës Ekonomike të Maqedonisë Veriperëndimore.

Edicioni i këtij viti i VET Samitit organizohet nga Klubi i Prodhuesve të Kosovës dhe Fondacioni Besa, përkrahet nga USAID Kosovo Compete Activity, Projekti ESVET PRO – Mbështetja e Bashkimit Evropian për Rikualifikimet Profesionale dhe Profesionet në AAP, Enhancing Youth Employment- EYE Project, Projekti ALLED 2 dhe Kosovo Challenge Fund dhe do të vijojë dhe nesër më 30 qershor 2021.