Kryetari i DHTIT-së, Z.Jaka pret në takim ambasadorin e Çekisë: Fokusi, investime në sektorin e mbrojtjes
Kryetari i Dhomës së Tregtisë dhe Industrisë, Tiranë, z. Nikolin Jaka, priti në një takim ambasadorin e Çekisë në Shqipëri, shkëlqesinë e tij z. Pavel Vacek, i cili shoqërohej nga shefi i seksionit ekonomik dhe tregtar, z. David Çernohorsky dhe z.Erion Shehi, asistent i parë për marrëdhënien ekonomike në ambasadën e Çekisë. Ky takim u zhvillua pas kërkesës së ambasadorit, i cili theksoi angazhimin e tij për të nxitur investimet Çeke në Shqipëri gjatë mandatit të tij diplomatik.
Z.Vacek u shpreh se një nga sektorët me interes të veçantë për investitorët Çekë është industria e mbrojtjes. Ambasadori bëri me dije se një nga kompanitë e mëdha nga Çekia ka shprehur interes për të investuar, në një kohë kur Shqipëria ka miratuar ligjin për industrinë ushtarake që synon rivitalizimin e ish-uzinave.
Po ashtu, ambasadori Z. Vacek njoftoi se më 6 mars, Ambasada e Çekisë do të organizojë një forum biznesi me pjesëmarrjen e rreth 15 bizneseve nga Çekia, të cilat kanë interes për sektorin e mbrojtjes dhe sigurisë kibernetike. Ai kërkoi mbështetjen e Dhomës së Tregtisë dhe Industrisë, Tiranë për të identifikuar dhe lidhur bizneset Çeke me partnerë lokalë.
Në përgjigje, z. Jaka shprehu gatishmërinë e plotë të DHTI-Tiranë për të mbështetur dhe lehtësuar investitorët e Çekisë në gjetjen e partnerëve vendas, krijimin e kontakteve të duhura dhe ofrimin e garancive për investime të sigurta dhe të qëndrueshme.
Gjatë bisedës, u vu theksi edhe te mundësitë e investimeve në sektorë të tjerë strategjikë, si industria e prodhimit dhe përpunimit të ushqimit dhe sektori minerar, të cilët paraqesin potencial të lartë për bashkëpunim ekonomik mes dy vendeve.
Dhoma e Tregtisë dhe Industrisë Tiranë riafirmoi rolin e saj si një urë lidhëse mes sipërmarrjeve shqiptare dhe investitorëve të huaj, duke ofruar mbështetje konkrete për zhvillimin e investimeve të reja dhe forcimin e marrëdhënieve ekonomike mes Shqipërisë dhe Çekisë.
