Kryetari i DHTIT-së, Nikolin Jaka pret në takim shefin e Misionit të Ambasadës së Kuvajtit

Shefi i Misionit të Ambasadës së Kuvajtit në Shqipëri, Z.Adnan Alghunaim realizoi vizitën e tij të parë në Dhomën e Tregtisë dhe Industrisë të Tiranës (DHTIT), që pas marrjes së detyrës. Gjatë takimit me Kryetarin e Dhomës, Z. Nikolin Jaka, u diskutua për forcimin e marrëdhënieve ekonomike ndërmjet Shqipërisë dhe Kuvajtit.

Në fjalën e tij, kryetari Jaka theksoi se ndonëse vendet kanë një marrëdhënie diplomatike të shkëlqyer, bashkëpunimi ekonomik mbetet ende në nivele të ulëta. Për këtë arsye, z. Jaka theksoi rëndësinë e zhvillimit të një agjende të përbashkët për të nxitur më tej bashkëpunimin tregtar dhe investimet.

Z.Jaka sugjeroi ngritjen e një grupi pune me qëllim vendosjen e urave të komunikimit midis ambasadës dhe Dhomës së Tregtisë dhe Industrisë së Kuvajtit, i cili sipas z. Alghunaim, është një institucion i rëndësishëm dhe shumë aktiv në Kuvajt.

Një mundësi tjetër që u diskutua ishte organizimi i një forumi biznesi. Kryetari Jaka theksoi se do të ishte më e dobishme që ky forum të realizohej në Tiranë, në mënyrë që sipërmarrësit dhe investitorët nga Kuvajti të mund të vlerësojnë më nga afër mundësitë e investimeve që ofron Shqipëria.

Për të mbështetur këtë nismë, DHTIT konfirmoi se do t’i dërgojë ambasadës së Kuvajtit një material përmbledhës për sektorët strategjik në Shqipëri si edhe për mundësitë e investimit nga investitorët e Kuvajtit.

DHTIT bëri me dije se është e hapur për çdo mundësi tjetër që mund të kontribuojë në rritjen e bashkëpunimit ekonomik dhe zhvillimin e marrëdhënieve tregtare midis dy vendeve.