Kreu i DHTIT në Konferencën Kombëtare: Sporti dhe impakti i tij në zhvillimin e ekonomisë

Kryetari i Dhomës së Tregtisë dhe Industrisë Tiranë, z.Nikolin Jaka ishte i ftuar në Konferencën Kombëtare të Sportit, në cilësinë e anëtarit të Këshillit të Lartë të Sportit.
Në fjalën e tij, z.Jaka shprehu vlerësimet e Dhomës së Tregtisë ndaj qeverisë shqiptare, për frymën dhe qasjen e krijuar me akte ligjore dhe nënligjore në mbështetje të edukimit fizik dhe sportiv.
“Një vlerësim i veçantë shkon për ministren znj.Kushi dhe stafin e saj, pasi është kjo Ministri që me parimin e gjithëpërfshirjes ka mundësuar një klimë bashkëpunimi për të gjithë aktorët dhe faktorët e këtij sektori jetik. Këshilli i Lartë i Sportit është një strukturë e krijuar enkas nga Ministria e Arsimit dhe Sporteve, për t’i ardhur në ndihmë politikbërjes në hartimin e strategjive të duhura për sektorin e edukimit fizik dhe sportiv.”

Duke folur për impaktin e sportit në zhvillimin e ekonomisë, z.Jaka vuri theksin te nevoja që vendi ynë ka për të rritur përqindjen e pjesëmarrjes së qytetarëve shqiptarë në edukimin sportiv, si një degë e rëndësishme e ekonomisë.
“Shqipëria ka nevojë të rritë përqindjen e pjesëmarrjes së qytetarëve shqiptarë në edukimin fizik dhe sportiv. 1 lek i investuar te sporti është e barabartë me 3 lek te investuara në shëndetësi. Sa më sportive të jetë një shoqëri, aq më i shëndetshëm është ajo, aq më shumë performon në dije, kulturë, efikasitet dhe produktivitet.”

Ashtu si sektorët e tjerë të ekonomisë, investimet në kulturën fizike dhe sportet kanë një efekt shumëfishues, pasi përfshin burime të konsiderueshme financiare dhe një numër të madh të fuqisë punëtore. Në fjalën e tij, kreu i DHTIT përmendi edhe ligjin për sponsorizimet, të cilin e konsideroi jo aq të mjaftueshëm në objektivin për zhvillimin dhe operimin e të gjitha llojeve të sportit në një sistem të strukturuar.
“Duhet të kemi një fushatë të mirëfilltë sensibilizimi që të edukojmë në radhë të parë administratën publike, e më pas qytetarin, që sipërmarrësi duhet të stimulohet, jo të paragjykohet; duhet të mbështetet, jo të penalizohet. Ne kemi një ligj për sponsorizimin, që mendojmë se është i mirë, por akoma nuk konkurrojmë vendet e rajonit. Duhet të zgjojmë pasionin dhe sportdashësin te sipërmarrja. Nuk duhet të ndalojmë te sponsorizimi. Sportin duhet ta kthejmë në ekonomi. Marrim rastin e stadiumit “Air Albania”, i cili u paragjykua dhe u akuzua.

Çfarë ndodh sot? Sot ndodh që në qendër të Tiranës kemi një stadium që është emblema e kombit shqiptar, e që ka një aktivitet shumëdimensional. Nuk është ndërtim i një stadiumi tradicional, por ofron shërbime biznesi që i shërbejnë ekonomisë. Kapërcen numrin e 500-1000 të punësuarve, e që asnjë nuk e imagjinonte dot gjenerimin nga ky investim. Duhen bërë sa më shumë struktura sportive që t’i vijnë në ndihmë edukimit fizik, strukturave ekonomike dhe shërbimit ekonomik. Sipërmarrja e ka kthyer kokën nga sporti sepse është e vetmja mënyrë për t’u ndier jo vetëm i shëndetshëm, por edhe i kuruar në mënyrën e duhur. Arti, kultura dhe sporti e veshin një popull me petkun e qytetarisë.”