Jaka me Ambasadorin e Arabisë Saudite: Është i nevojshëm intensifikimi i marrëdhënieve ekonomike, të hapur për marrëveshje të reja

Kryetari i Dhomës së Tregtisë dhe Industrisë Tiranë, zoti Nikolin Jaka zhvilloi më 17 mars 2021 një takim me Ambasadorin e Arabisë Saudite në Shqipëri, zotin Abdulmomen Sharaf. Takim i zhvilluar në ambientet e Ambasadës në Tiranë.

Kryatri Jaka shoqërohej në këtë takim nga zoti Astrit Panxha, Drejtor ekzekutiv i Klubit të prodhuesve të Kosovës, zoti Shkëlqim Devolli biznesmen dhe CEO i Devolli Coorporation dhe zonja Aris Tasho, Drejtore e Marrëdhënieve me Jashtë e DHTIT.

Gjatë këtij takimi ju kushtua një vëmendje e veçantë marrëdhënieve midis dy vendeve, duke shprehur interesin dhe dëshirën e përbashkët që edhe marrëdhëniet ekonomike midis dy vendeve të jenë në nivelet e atyre politike.

Kryetari Jaka shprehu interesin për konsolidimin e mëtejshëm të marrëdhënieve ekonomike duke propozuar firmosjen e një marrëveshje bashkëpunimi midis DHTIT dhe Dhomës së Tregtisë së Riyadh-it.

Ambasadori nga ana e tij u shpreh se ka zhvilluar shumë takime me Kryeministrin dhe Ministrin e Jashtëm të Shqipërisë për realizimin dhe firmosjen e një marrëveshjeje tregtie dhe mbrojtje investimesh, pasi kjo sipas tij do të ishte hapi më i rëndësishëm për t’ju dëshmuar siguri investitorëve nga Arabia Saudite.

Referuar kësaj çështjeje kryetari Jaka shpreh bashkëpunimin e tij maksimal edhe në përpunimin e një drafti për të bërë të mundur sa më shpejt lehtësimin në fushën e tregtisë dhe investimeve.

Lidhur me këtë çështje kreu i DHTIT sugjeroi bashkëpunimin e tij për ngritjen e një bordi bashkëpunimi për aktivizimin e marrëveshjeve të tregtisë dhe nxitur kështu investimet.

Kryetari i DHTIT mbështeti mendimin që komunikimi dhe networku në botën e biznesit do të ishte hapi i parë kryesor dhe për marrëdhëniet e mëtejshme ndërmjet vendeve pasi biznesi është më operativ edhe më pragmatik.

Ftesës së zotit Panxha drejtuar ambasadorit për të realizuar një vizitë në Kosovë, kryetari i DHTI ju përgjigj me bashkëngjitjen e një delegacioni biznesi anëtar të Dhomës ku të bëhet e mundur organizim e një konference të përbashkët.

Ambasadori, duke e cilësuar ekonominë saudite si më të fortën e Lindjes së Mesme shprehu interesin për hapje globale të saj duke shtuar që tregu i Shqipërisë dhe Kosovës janë tregje premtuese.