Jaka-Hakos: DHTIT mbështet biznesin që drejtohet nga femrat. Gruaja në sipërmarrje një nevojë dhe risi për tregun

Kryetari i Dhomës së Tregtisë dhe Industrisë Tiranë zoti Nikolin Jaka priti në një takim pranë ambienteve të Dhomës, zonjën Antoneta Hako, kryetare e Dhomës Ekonomike të Gruas.

Në këtë takim u ndanë mendime për situatën e biznesit në vend dhe mbështetjen që duhet të marrin gratë sipërmarrëse në zhvillimin e ideve të tyre. Kreu i DHTIT si mbështetës i gruas në sipërmarrje u shpreh në këtë takim se Dhoma është përherë një partnere dhe ombrellë e duhur për të zhvilluar idetë dhe ndihmuar gratë që kanë iniciativa apo drejtojnë sipërmarrje të ndryshme.

Nga ana e saj zonja Hako u shpreh se e vlerëson rolin e Dhomës në mbrojtje të sipërmarrjes dhe e shikon institucionin si një mundësi për të bashkëpunuar me projekte konkrete.