Dhoma e Tregtisë dhe Industrisë Tiranë nënshkruan marrëveshje bashkëpunimi me Dhomën e Tregtisë Ndërkombëtare të Kazakistanit
Kryetari i Dhomës së Tregtisë dhe Industrisë Tiranë, zoti Nikolin Jaka zhvilloi një vizitë zyrtare në Astana, Kazakistan. Zoti Jaka i shoqëruar nga një grup sipërmarrësish anëtar të Dhomës ishin pjesë e një delegacioni të Ministrisë për Evropën dhe Punët e Jashtme. Kjo vizitë e para e këtij niveli në këtë shtet, shërbeu gjithashtu për të vendosur një bashkëpunim të ri mes dy Dhomave tona, duke nënshkruar marrëveshjen e bashkëpunimit mes Dhomës së Tiranës dhe asaj të Astanës. Kryetari Jaka duke e konsideruar këtë moment si të rëndësishëm u shpreh se “nënshkrimi i marrëveshjes së bashkëpunimit mes Dhomës së Tregtisë dhe Industrisë Tiranë dhe Dhomës së Astanas shpresoj të jetë një hap i rëndësishëm në rishikimin e marrëdhënieve ekonomike”. Kjo sipas Jakës vlen për disa arsye të rëndësishme. “Kuadri ynë ligjor ekzistues ofron një mjedis të përshtatshëm për investimet e huaja, në veçanti për sektorët strategjike si: energjia (hidro, hidrokarburet, solare dhe erës), minierat, transporti, telekomunikacioni, bujqësia, peshkimi zonat ekonomike etj. Sektor i rëndësishëm është edhe ai i agro-përpunimit. Karakteristikat e veçanta në vlera dhe në shije që kanë produktet e bujqësisë shqiptare, përpunimi i produkteve bio, do të ndihmonte në rritjen e vlerës së eksporteve dhe llojshmërisë së tyre drejt tregut në Kazakistan”, u shpreh Jaka.
Nënshkrimi i marrëveshjes u bë pas takimit që Ministri për Evropën dhe Punët e Jashtme Ditmir Bushati zhvilloi me Ministrin e Jashtëm të Republikës së Kazakistanit, Kairat Abdrakhmanov.
Në takimin me homologun kazak, Ministri Bushati e vuri theksin në rëndësinë e intensifikimit të marrëdhënieve ekonomiko-tregtare, përmes konkretizimit të lidhjeve në sektorë të ndryshëm të biznesit, në fushat me interes të përbashkët mes dy vendeve.
