BE afron universitetin me biznesin: DHTIT dhe dy universitete shqiptare përgatisin kuadrot për tregun europian

Përmes projektit DERHE të programit Erasmus+, pedagogë dhe studentë të Universitetit të Tiranës dhe Universitetit Politeknik të Tiranës kaluan nga auditori në kompani, me Dhomën e Tregtisë dhe Industrisë së Tiranës si urë lidhëse me biznesin.

Tiranë, 4 nëntor 2026

Sa më shumë i afrohet Shqipëria anëtarësimit në Bashkimin Evropian, aq më e qartë bëhet një pyetje që shkon përtej kapitujve negociues: a do të ketë ekonomia shqiptare njerëzit e përgatitur për të konkurruar në tregun e përbashkët europian? Projekti DERHE, i financuar nga Bashkimi Evropian, po jep një përgjigje praktike: e vendos arsimin e lartë dhe biznesin në të njëjtën tryezë, që në fazën kur formohen specialistët e së nesërmes.

Një hendek që biznesi e njeh mirë

Kompanitë shqiptare e ngrenë prej vitesh të njëjtin shqetësim: të diplomuarit vijnë me njohuri teorike, por me pak përvojë në mënyrën si funksionon një kompani reale, si menaxhohet një projekt apo si përdoren mjetet digjitale në punën e përditshme. Ky hendek bëhet më i kushtueshëm tani që biznesi shqiptar përballet me standardet, konkurrencën dhe ritmin e tregut europian, si dhe me dy tranzicionet që BE po u kërkon ekonomive të rajonit: atë digjital dhe atë të gjelbër.

Nga auditori te kompania

Në kuadër të DERHE, Dhoma e Tregtisë dhe Industrisë së Tiranës (DHTIT) , në cilësinë e partnerit, ka shërbyer si pika e kontaktit mes universiteteve dhe komunitetit të biznesit. Gjatë zbatimit të projektit u zhvilluan trajnime dhe takime ku akademikët, studentët dhe sipërmarrësit punuan bashkë mbi tema me ndikim të drejtpërdrejtë në konkurrueshmëri:

• ekonomia e inteligjencës artificiale dhe ekonomia e gjelbër;
• menaxhimi i projekteve, nga teoria te zbatimi praktik;
• Lean Management, me trajnim të zhvilluar brenda ambienteve të kompanisë Maccaferri Balkans;
• vizita studimore në kompani, ku pjesëmarrësit panë nga afër proceset e prodhimit dhe organizimit;
• panele dhe takime dialogu mes akademisë dhe industrisë.

Qëllimi ishte i thjeshtë: njohuria që jepet në auditor të testohet dhe të pasurohet me përvojën e atyre që e zbatojnë çdo ditë në treg.

Dhoma, partner i vazhdueshëm i reformës

Për DHTIT, DERHE është pjesë e një angazhimi më të gjerë. Dhoma është aktualisht partnere në disa projekte të financuara nga BE, që synojnë digjitalizimin, aftësimin dhe forcimin e konkurrueshmërisë së bizneseve, duke u pozicionuar si zëri i biznesit edhe në diskutimin për të ardhmen e arsimit.

„Integrimi europian nuk ndërtohet vetëm me ligje, por me njerëz të aftë. Një biznes shqiptar që do të konkurrojë në tregun e përbashkët ka nevojë për specialistë që e njohin realitetin e kompanisë që në bankat e universitetit. Prandaj Dhoma do të vazhdojë t’i hapë dyert e bizneseve për akademinë dhe studentët”, deklaroi Marina Pilinçi, Koordinatore e Projektit/ Drejtuese e Departamentit të Trajnimeve pranë DhTIT.

Çfarë mbetet pas projektit

DERHE, i cili përmbyllet në nëntor 2026, lë pas rezultate që vazhdojnë të prodhojnë efekt: kurse të reja dhe të përditësuara në fushën e arsimit digjital, kapacitete më të forta në universitetet partnere dhe një rrjet bashkëpunimi mes akademisë dhe biznesit që nuk mbyllet me afatin e financimit. Për Shqipërinë, ky model ofron një shembull konkret se si fondet europiane mund të përkthehen në aftësi të prekshme për tregun e punës.

Rreth projektit DERHE

DERHE (Digital Education Readiness in the field of Higher Education) është projekt i programit Erasmus+, në kategorinë Ngritje Kapacitetesh në Arsimin e Lartë, i koordinuar nga Universiteti i Lublanës (Slloveni). Projekti zbatohet nga dhjetori 2023 deri në nëntor 2026 dhe bashkon 12 partnerë nga 5 vende: universitete dhe dhoma tregtie nga Sllovenia, Belgjika, Bosnjë-Hercegovina, Mali i Zi dhe Shqipëria. Partnerët shqiptarë janë Universiteti i Tiranës, Universiteti Politeknik i Tiranës dhe Dhoma e Tregtisë dhe Industrisë së Tiranës.

Financuar nga Bashkimi Evropian. Pikëpamjet dhe opinionet e shprehura janë vetëm ato të autorëve dhe nuk pasqyrojnë domosdoshmërisht ato të Bashkimit Evropian ose të Agjencisë Ekzekutive Evropiane për Arsimin dhe Kulturën (EACEA). As Bashkimi Evropian, as EACEA nuk mund të mbahen përgjegjës për to.