Sipërmarrësit e Dhomës së Tregtisë dhe Industrisë Tiranë, takime biznesi me sipërmarrësit Sllovenë
Më shumë se 50 biznese shqiptare dhe sllovene u takuan sot në forumin e biznesit “Shqipëri-Slloveni”, organizuar në Tiranë. Në këto takime specifike kryesisht në fushën e infrastrukturës, teknologjisë, turizmit, energjisë, agro-përpunimit etj., sipërmarrësit e dy vendeve për kishin një paradite pune dhe kontaktesh që sipas vetë tyre u konsideruan të vlefshme. Pjesë e këtij forumi ishin dhe kryetarët e Dhomave të Tregtisë së të dy vendeve dhe Ministrat e Jashtëm.
Kryetari i Dhomës së Tregtisë dhe Industrisë Tiranë, zoti Nikolin Jaka dhe si pritësi i sipërmarrësve sllovenë, duke i falenderuar për ardhjen në Tiranë u shpreh se “bashkëpunimi ynë mes Dhomave të Tregtisë dhe Industrive të dy vendeve tona është i hershëm i konkretizuar që në vitin 2009 me marrëveshjen e bashkëpunimit mes dy dhomave tona, duke na çuar në bashkëpunim permanent me sipërmarrësit e dy vendeve”. Duke falenderuar Ministrat për praninë e tyre në forum, Jaka vlerësoi rëndësinë e këtij takimi me idenë e hedhjes së hapave konkretë në kontrata biznesi mes sipërmarrësve të të vendeve. “Dhoma jonë në bashkëpunim me Ambasadën e Sllovenisë, dhomën homologe mendoj se duhet të punojmë më shumë në fushën e shkëmbimit të informacionit, veçanërisht për mundësi konkrete financimi si: fonde, grante dhe skema financimi që mund të ofrohen nga qeveria Sllovene në drejtim të konkurrueshmërisë dhe inovacionit, dhe në përfitim të biznesit shqiptar”, u shpreh ai në fjalën e tij duke shtuar se “forumi i sotëm e sjell këtë informacion të rëndësishëm nga ku ne si dhome marrim përgjegjësinë maksimale në informimin dhe nxitjen e sipërmarrjes sonë për të qenë përfitues të këtyre avantazheve nga vendet e huaja, konkretisht nga Sllovenia”. Homologu i tij slloven zoti Matej Rogejl e shikon vendin tonë si një mundësi që sipërmarrësit slloven të investojnë kapitalet e tyre. Ai u shpreh në forum se “është e rëndësishme të vendosim kontakte të vazhdueshme dhe të shohim se ku mund të zhvillohen kapitalet tona”.
Ndërsa Ministri për Evropën dhe Punët e Jashtme, Ditmir Bushati, dhe zv/kryeministrin dhe Ministrin e Punëve të Jashtme të Sllovenisë, Miro Cerar përshëndetën Forumin e Biznesit shqiptaro-slloven, duke vlerësuar interesin e dyanshëm dhe potencialin real të pashfrytëzuar deri tani duke theksuar se bashkëpunimi ekonomik, do të jetë një prioritet për dy ministritë e Jashtme dhe diplomacinë ekonomike.
Ministri Bushati theksoi se Forumi i biznesit është dëshmia e fundit e angazhimit të përbashkët si dhe një konfirmim i potencialit real për rritjen e shkëmbimeve tregtare, fuqizimin e bashkëpunimit ekonomik, si dhe nxitjen e investimeve. Në këtë kontekst, në Forumin e Biznesit Shqipëri-Slloveni, u vu theksi tek rëndësia e bashkëpunimit në fushën e turizmit, energjisë, mjedisit, agro-përpunimit, farmaceutikës, infrastrukturës, etj.
