Marrëdhëniet tregtare Shqipëri-Kosovë, deri më 15 korrik 2019 bizneset të paraqesin problematikat e tyre pranë Forumit Ekonomik Mbarë Shqiptar
Forumi Ekonomik Mbarë Shqiptar po ndjek më shumë interes dhe vëmendje marrëdhëniet ekonomike rajonale dhe në mënyrë të veçantë Shqipëri – Kosovë.
Konferenca e organizuar në 21 maj në Tiranë më temë “Mundësitë dhe sfidat e marrëdhënieve tregtare Shqipëri-Kosovë”, nxori në pah pengesat e mëdha që aktualisht sipërmarrja e të dy shteteve tona po përjeton.
Përfaqësuesit e lartë të qeverisë se Kosovës reklamuan një sondazh të realizuar në sipërmarrjen e Kosovës lidhur më pengesat e të bërit biznes më fokus eksportin.
Fatkeqësisht Shqipëria radhitej e dyta në renditjen e vendeve të rajonit.
Nga ana tjetër edhe sipërmarrja shqiptare ka rezervat e veta lidhur më pengesat dhe vështirësitë e penetrimit në tregun e Kosovës.
Forumi Ekonomik Mbarë Shqiptar gjykon që kjo situatë problematike jo vetëm që nuk i shërben krijimit të një klime bashkëpunuese dhe ndërvepruese ndërmjet sipërmarrjeve të vendeve tona, por kjo klimë konfliktuale i largon më shumë sipërmarrjet dhe qytetarët e dy shteteve dhe një kombi.
Sa me sipër Forumi Ekonomik Mbarë Shqiptar ka ngritur grupin e punës dhe kordinatorët përkatës.
Kordinatori për Kosovën është Oda Ekonomike e Kosovës dhe kordinatori për Shqipërinë është Dhoma e Tregtisë dhe Industrisë Tiranë më detyra të përcaktuara si më poshtë:
1. Mbledhjen dhe filtrimin e te gjithë problematikës që kanë sipërmarrjet e Shqipërisë dhe Kosovës brenda datës 15 korrik 2019.
2. Analizimin e materialit përmbledhës të kordinatorëve të dy vendeve nga grupi i punës i Forumit Ekonomik Mbarë Shqiptar brenda datës 20 korrik 2019.
3. Miratimi në Bordin e Forumit Ekonomik Mbarë Shqiptar i materialit përfundimtar që do ju drejtohet dy qeverive të Shqipërisë dhe Kosovës brenda datës 30 korrik 2019.
Në këtë kontekst Dhoma e Tregtisë dhe Industrisë Tiranë si kordinatore e këtij forumi për Shqipërinë u bën thirrje publike të gjithë sipërmarrjeve shqiptare që ushtrojnë aktivitetin e tyre eksportues më Kosovën që brenda datës 15 korrik 2019 të reklamojnë në formë te shkruar problematikat dhe pengesat e hasura gjatë ushtrimit të aktivitetit të tyre duke ju garantuar që Forumi Ekonomik Mbarë Shqiptare do trajtojë më objektivitet dhe në mënyrë profesionale procedurën e zgjidhjes së pengesave dhe barrierave që kushtëzojnë potencialet dhe mundësitë e të bërit biznes Shqipëri-Kosovë.
Ju bëjmë më dije që numri i sipërmarrjeve shqiptare që eksporton në Kosovë nuk e kalon numrin prej 800 subjekte tregtare duke ju referuar të dhënave të 6 mujorit të parë 2019. Një shifër kjo jashtë mase e ulët po ta krahasojmë me potencialet që kanë sipërmarrjet tona të një kombi.
