Kryetari JAKA takon ambasadorin e Kazakistanit, Z. Yerkebulan Sapiyev

Kryetari i Dhomës së Tregtisë dhe Industrisë Tiranë, Z. Nikolin Jaka, priti në zyrën e tij Ambasadorin e Kazakistanit në Turqi, Shkëlqesinë e tij Z. Yerkebulan Sapiyev, si dhe Konsullin e Nderit të Kazakistanit në Shqipëri, Z. Afrim Pacolli.

Në fokus të takimit ishte forcimi i mëtejshëm i marrëdhënieve dhe shkëmbimeve të sipërmarrësve nga të dyja vendet.

Teksa vlerësoi dhe theksoi vijueshmërinë e fuqizimit të partneritetit mes dy vendeve, Z. Sapiyev, veçanërisht, vuri në dukje potencialet e Shqipërisë në turizëm, ku renditi sugjerimet e tij për zhvillimin e bashkëpunimit dypalësh në këtë sektor.

“Duhet të krijojmë korridoret e transportit për ta arritur këtë qëllim. Të bëjmë analiza dhe kërkime për shërbimet e transportit. Mund të krijojmë gjithashtu një grup pune për të promovuar turizmin e dy vendeve dhe të shpalosim paketat turistike.”

Ky propozim u prit pozitivisht nga Kreu i DhTIT Tiranë, Z. Jaka, i cili, gjatë fjalës së tij përmendi edhe energjinë, sidomos energjitë e rinovueshme, si një ndër sektorët më të rëndësishëm për zhvillimin e investimeve në vendin tonë.

“Ne jemi të gatshëm të organizojmë forume biznesi dhe të bëjmë pse jo edhe një tur për të eksploruar/prezantuar kështu interesat konkrete të palëve në turizëm, energji etj. Mundësitë për të investuar në Shqipëri janë të pafundme.”

Gjatë takimit, diplomati Sapiyev solli në kujtesë edhe nënshkrimin e marrëveshjes në Asamblenë e Kombeve të Bashkuara për heqjen e ndërsjellë të vizave që hyn në fuqi në prill të këtij viti, hap i cili do të ndikojë në rritjen e bashkëpunimit ekonomik dhe tregtar ndërmjet dy vendeve.

Nga ana tjetër, Z. Afrim Pacolli, përfaqësues i “Mabetex Group” dhe njëkohësisht Konsull i Nderit të Kazakistanit në Shqipëri, hodhi si ide realizimin e një organizimi për të mirëpritur në Shqipëri biznesmenët e Kazakistanit që ta shohin vendin tonë si një opsion për të investuar.

“Unë falenderoj qeverinë e Kazakistanit për besimin dhe ndihmën që na ka ofruar. Sugjerimi im është të bëjmë një organizim për të sjellë biznesmenët e Kazakistanit në Shqipëri për t’iu treguar se ku mund të investojnë këtu.”

Në përfundim të takimit, palët shprehën vendosmërinë që propozimet e bëra gjatë takimit të jetësohen në punë konkrete.