Kryetari i DHTIT, Z. Nikolin Jaka, në Tajlandë për mundësi të reja bashkëpunimi
Kryetari i Dhomës së Tregtisë dhe Industrisë të Tiranës, Z. Nikolin Jaka, ka realizuar një vizitë 3-ditore në Tajlandë, ku zhvilloi takime të rëndësishme, me qëllim forcimin e lidhjeve tregtare dhe investuese midis 2 vendeve.
Gjatë vizitës, Z. Jaka ishte shoqëruar nga Drejtoresha e Eventeve dhe B2B në DHTIT, Ornela Gaçe, si dhe një delegacion nga Shqipëria. Ky delegacion ishte i përbërë nga përfaqësues biznesi, anëtarë të Dhomës, si Aleksandër Naçi nga “Agna Group”; Amarildo Shaholli, “Greenpanel Shpk”; Renato Begaj, “Erzeni”; Ylli Hoxha “HIDROFAHO”; Rodolf Xhillari, “Balkan Trans Albania”; Mark Babani “Mare Adriatik Shpk”; Kreshnik Lesakaj, “Biote” dhe Jurgen Memisha “X Plan Studio”.
Një nga momentet kyçe të vizitës ishte takimi me Kryebashkiakun e Phuket, Z. Saroj Angkanapilas, si dhe me Kryetarin e Dhomës së Tregtisë së këtij qyteti, Z. Kongsak Khoopongsakorn. Këto takime kishin për qëllim eksplorimin e mundësive të bashkëpunimit ndërmjet bizneseve të dy vendeve, ku përveç shkëmbimeve tregtare, u fol edhe për mundësitë për investime dhe zhvillimin e projekteve të përbashkëta.
Nikolin Jaka theksoi gjatë bisedimeve se Dhoma e Tregtisë dhe Industrisë e Tiranës është e gatshme të kontribuojë në rritjen e fluksit të komunikimit ndërmjet bizneseve të Shqipërisë dhe Tajlandës, duke hapur mundësi për bashkëpunime konkrete dhe partneritete të qëndrueshme.
Kjo vizitë e Dhomës së Tregtisë dhe Industrisë Tiranë është një hap i rëndësishëm drejt forcimit të marrëdhënieve ekonomike dhe të biznesit ndërmjet 2 vendeve, me një fokus të veçantë në mundësitë e bashkëpunimit në sektorët e investimeve, turizmit dhe tregtisë.
