“Katari interes për investime”, kryetari i DHTIT-së Nikolin Jaka dhe ambasadori Al Dosari vizitë në kompaninë “Filipi Co”

Kryetari i Dhomës së Tregtisë dhe Industrisë, Tiranë, z. Nikolin Jaka, zhvilloi një vizitë në ambientet e kompanisë “Filipi Co”, e specializuar në mbledhjen, përpunimin dhe eksportin e bimëve medicinale dhe aromatike.

Kjo vizitë u realizua pas interesit të veçantë të treguar nga Ambasadori i Katarit në Shqipëri, z. Jabor bin Ali Al Dosari, për të eksploruar mundësitë e investimeve të Katarit në sektorë strategjik të ekonomisë shqiptare.

Gjatë vizitës, z. Jaka theksoi se Shqipëria ka një traditë të gjatë dhe burime të jashtëzakonshme në kultivimin dhe përpunimin e bimëve medicinale, një sektor me potencial të lartë për eksport dhe për tërheqjen e investimeve të huaja.

Nga ana tjetër, ambasadori i Katarit ka shprehur një interes të veçantë për mundësitë e investimeve në sektorë me potencial të lartë në Shqipëri, ku përfshihet edhe industria e bimëve medicinale.

Vizita është pjesë e një angazhimi të vazhdueshëm të DHTIT-së për të promovuar sektorët kryesorë të ekonomisë shqiptare dhe për të forcuar bashkëpunimin ekonomik mes Shqipërisë dhe partnerëve ndërkombëtarë, si Katari.