DHTIT nënshkruan memorandum bashkëpunimi me Dhomën Tregtare të Profesionistëve të Athinës

Dhoma e Tregtisë dhe Industrisë, Tiranë dhe Dhoma Tregtare të Profesionistëve të Athinës (ACT) kanë nënshkruar më 11.12.2025 një memorandum bashkëpunimi, duke hapur një kapitull të ri në forcimin e marrëdhënieve ekonomike mes Shqipërisë dhe Greqisë.

Dokumenti u firmos nga nënkryetari i DHTI-Tiranë, z. Loritan Prespa dhe Kryetari i ACT, z. Ioannis Hatzitheodosiou në një ceremoni zyrtare të organizuar në ambientet e Dhomës së Tregtisë dhe Industrisë, Tiranë.

Memorandumi i Mirëkuptimit synon: nxitjen e shkëmbimeve tregtare; mbështetjen e sipërmarrjeve të vogla dhe të mesme; krijimin e mundësive të reja për bashkëpunim dhe partneritete biznesi.

Në takimin dypalësh mes delegacioneve u diskutuan mundësitë për hapjen e hapësirave të reja bashkëpunimi dhe zhvillimin e partneriteteve të reja në sektorë kyç të ekonomisë, duke u bazuar në potencialin e madh që ekziston mes Shqipërisë dhe Greqisë.

Një dëshmi e angazhimit për bashkëpunim konkret ishte edhe prania e Kryetarit të Komisionit Greko-Shqiptar të Profesionistëve pranë ACT, z. Kristaq Konduri, si pjesë e delegacionit.

Në aktivitet ishte e pranishme edhe Diplomatja për çështjet ekonomike dhe tregtare në Ambasadën e Shqipërisë në Greqi, znj. Joana Zhonga, duke nënvizuar angazhimin e vazhdueshëm të Ambasadës për të mbështetur dhe lehtësuar lidhjet ekonomike mes komuniteteve të biznesit të të dy vendeve.

Ky Memorandum pritet të kontribuojë ndjeshëm në zgjerimin e bashkëpunimit ekonomik, rritjen e ndërveprimit mes bizneseve dhe krijimin e mundësive të reja për zhvillim dypalësh.