DHTIT në bashkëpunim me Drejtorinë e Tatimeve mban seminar informues për bizneset në sektorin tatimor

Sot, më 7 Mars, Drejtoria e Përgjithshme e Tatimeve në bashkëpunim me Dhomën e Tregtisë dhe Industrisë, Tiranë organizoi një seminar informues për bizneset. Aktiviteti i cili zgjati për rreth 2 orë, u zhvillua në Hotel Plaza, Tiranë dhe trajtoi disa çështje të rëndësishme për të gjithë ata që janë të përfshirë në sektorin tatimor.

Seminari u udhëhoq nga Znj. Rozana Çelmeta, Drejtore e Drejtorisë së Proceseve të Biznesit në Drejtorinë e Përgjithshme të Tatimeve, e cila ofroi një prezantim të detajuar dhe u përgjigj pyetjeve të bizneseve pjesëmarrësve, anëtare të Dhomës së Tregtisë dhe Industrisë, Tiranë.

Në fokus ishte implementimi në sistemin e e-Filing të deklaratave të reja tatimore, përfshirë Listëpagesën dhe Tatimin në Burim; Deklarata e Statusit Personal, mënyra e aplikimit, afatet dhe efektet e saj; DIVA 2024, ndryshimet kryesore, afatet dhe detajet mbi deklarimin.

Ky aktivitet kishte për qëllim të mbështeste bizneset në orientimin e duhur përkatësisht në zbatimin e ligjeve dhe procedurave tatimore, si dhe të kontribuonte në rritjen e ndërgjegjësimit dhe efikasitetit të proceseve të biznesit në Shqipëri.