DEKLARATË ZYRTARE

Rëndësia e investimeve të huaja për ngritjen e vlerës së turizmit shqiptar

TIRANË, 2 qershor 2026

Dhoma e Tregtisë dhe Industrisë Tiranë vlerëson se investimet e mëdha të huaja në turizmin cilësor përbëjnë instrumentin vendimtar për ta kthyer rritjen e shpejtë të numrit të vizitorëve në vlerë reale ekonomike për vendin. Në këtë kuadër, projekti prej rreth 4 miliardë eurosh në Sazan dhe Zvërnec shihet si një investim me peshë strategjike për sektorin.

Sipas të dhënave të INSTAT, gjatë vitit 2025 Shqipëria priti rreth 12.5 milionë vizitorë të huaj, një rritje prej rreth 7% krahasuar me vitin paraardhës dhe 82% më shumë se në vitin 2019, ndër ritmet më të larta të rritjes në rajon. Megjithatë, shpenzimi mesatar për vizitor mbetet ndjeshëm më i ulët krahasuar me destinacionet e zhvilluara të rajonit, ku të ardhurat nga turizmi rriten me ritëm pothuajse dyfish më të shpejtë se numri i vizitorëve.

Ky është, sipas vlerësimit të DHTIT, hendeku kryesor strukturor i sektorit. Sfida e turizmit shqiptar nuk qëndron më te numri i vizitorëve, por te vlera e krijuar nga secili prej tyre. Modeli aktual, i mbështetur kryesisht në turizmin sezonal dhe akomodimin me çmim të ulët, kufizon të ardhurat, qëndrueshmërinë e vendeve të punës dhe investimet afatgjata. Zhvendosja nga vëllimi te vlera kërkon akomodim premium, marka ndërkombëtare të menaxhimit dhe tërheqjen e një klientele me fuqi më të lartë blerëse.

Pikërisht në këtë drejtim qëndron rëndësia e investimeve të shkallës së Affinity Partners. Projekti parashikohet të krijojë rreth 1,000 vende pune vetëm në komponentin e Sazanit dhe mijëra të tjera në fazën e plotë të zhvillimit.

Megjithatë, efekti i tij ekonomik shkon përtej shifrave të drejtpërdrejta. Një investim i kësaj shkalle dhe i kësaj cilësie funksionon si katalizator: prania e fondeve ndërkombëtare të nivelit të lartë rivlerëson Shqipërinë si destinacion serioz investimi dhe nxit hyrjen e kapitalit dhe operatorëve të tjerë ndërkombëtarë në treg.

Dhoma e Tregtisë dhe Industrisë Tiranë vlerëson se investimet e kësaj rëndësie zhvillojnë potencialin e tyre të plotë kur shoqërohen me standarde të qëndrueshme institucionale dhe mjedisore. Cilësia e investimit dhe cilësia e mjedisit ku ai realizohet ecin bashkë, duke përbërë themelin e një turizmi konkurrues dhe afatgjatë.

DHTIT fton institucionet shtetërore, komunitetin e biznesit dhe aktorët vendorë t’i trajtojnë investimet strategjike në turizëm si mundësi kombëtare për zhvillim afatgjatë, duke siguruar njëkohësisht që vlera e krijuar të mbetet dhe të riinvestohet në ekonominë shqiptare.