Nënshkruhet marrëveshja e bashkëpunimit mes DHTIT dhe shkollës profesionale “Shën Jozefi Punëtor”

Dhoma e Tregtisë dhe Industrisë Tiranë nënshkroi ditën e premte, datë 23.06.2023, marrëveshjen e bashkëpunimit me Shkollën Profesionale “Shën Jozefi Punëtor”, Rrëshen, për periudhën trevjeçare 2023-2025.

Ky hap u ndërmor në kuadër të Projektit “Partneriteti për Arsimin dhe Formimin Profesional në Shqipëri”.

Marrëveshja, e cila u firmos nga Kryetari i DHTIT, z.Nikolin Jaka dhe Drejtori i SHJP-së, z.Michele Leovino, pranë ambienteve të Shkollës Profesionale “Shën Jozefi Punëtor”, ka në fokus nxitjen e trajnimeve profesionale për të përmirësuar mundësitë e punësimit jo vetëm për maturantët, por edhe për sipërmarrjet që duan të investojnë në kualifikimin profesional të stafeve të tyre.

Nënshkrimi i kësaj marrëveshjeje u krye gjatë ceremonisë së diplomimit dhe certifikimit të maturantëve.

Në fjalën e tij përshëndetëse, z. Jaka shprehu gatishmërinë e DHTIT për t’iu ofruar mbështetje dhe mundësi të gjithë të diplomuarëve për të pasur qasje sa më konkrete në tregun e punës.