Klima e biznesit dhe tërheqja e investimeve/ Mesazhi i kryetarit Jaka në “Kosova Business Forum”

Z.Jaka ishte i ftuar si folës në panelin me temë “Dialogu për klimën e biznesit dhe tërheqjen e investimeve”, ku diskutimet u përqendruan mbi klimën e biznesit dhe potencialet investuese.

Në fjalën e tij, kreu i DHTIT-së vuri theksin te zbatimi i reformave strukturore, krijimi i politikave nxitëse për zhvillimin e aftësive dhe kualifikimit të kapitalit njerëzor në përputhje me axhendën evropiane, inovacioni, si dhe te përmirësimi i infrastrukturës, që do të ndihmonte ekonominë të integrohej më shumë në zinxhirët e vlerës globale.

“Është shumë i rëndësishëm jo vetëm dialogu, por edhe fryma e dialogut, rezultati që del nga dialogu. Është e rëndësishme që propozimet e biznesit të përfshihen në platformat dhe strategjitë e qeverive të vendeve tona. Ballkani Perëndimor nuk përballet vetëm me sfida të brendshme, por edhe me sfidën e integrimit në BE. Jemi të detyruar që te kemi një integrim të bashkërenduar të 6 vendeve të Ballkanit Perëndimor. Për këtë, ne na duhet të kemi një ekonomi komplomentare. Rajoni ynë është i papërgatitur për t’u ballafaquar me fuqinë ekonomike të kontinentit evropian. Fuqia e kompanive evropiane është një risk i madh nëse ne nuk përgatitemi për të qenë partner. Do të ngelim thjesht nënkontraktor, duke minimizuar fuqinë tonë gjithnjë e më shumë, e duke kaluar në varësinë totale të këtyre kompanive. Prandaj, sfida aktuale sot që sipërmarrjet e 6 vendeve të Ballkanit Perëndimor kanë, është të rrisin performancën e tyre, të zhvillojnë kapitalin human, të jenë inovativë dhe të përshtaten me teknologjitë e reja”, nënvizoi z.Jaka.

Nën moton “Fuqizimi i atyre që sjellin ndryshime”, ky forum synon të forcojë lidhjet midis sektorit publik dhe atij privat, të inkurajojë bashkëpunimin ndërkombëtar dhe të prezantojë mundësi konkrete investimi.