Forum biznesi “Shqipëri-Izrael” në shtator
Ambasada e Izraelit në Shqipëri, në bashkëpunim me Dhomën e Tregtisë dhe Industrisë Tiranë si dhe Institutin e Eksportit në Izrael do të organizojnë një forum biznesi (B2B).
Ky forum i nivelit të lartë do të mirëpresë në Tiranë një delegacion me përfaqësues të bizneseve izraelite nga sektorët e energjisë, teknologjisë e sigurisë kibernetike, bujqësisë e menaxhimit të ujërave, dhe turizmit.
Këto kompani kanë interes që të njihen më nga afër me potencialin dhe mundësitë konkrete që Shqipëria ofron, si edhe të njihen me sipërmarrës shqiptarë për të krijuar mundësi të reja bashkëpunimi.
Forumi do të zhvillohet në formatin e një konference me folës të nivelit të lartë qeveritar të të dyja vendeve. Pjesë e këtij aktiviteti do të jetë edhe Kryetari i Dhomës së Tregtisë dhe Industrisë Tiranë, z.Nikolin Jaka.
Ftohen të marrin pjesë në këtë forum të gjitha kompanitë e interesuara në zgjerimin e partneriteteve të reja.
Lutem konfirmoni pjesëmarrjen tuaj brenda datës 01.09.2023 në adresën: ornela_gace@cci.al
Të dhëna mbi diplomacinë ekonomike Shqipëri-Izrael
Republika e Shqipërisë njeh Shtetin e Izraelit prej 19 Prillit të vitit 1949. Në sajë të kushteve politike të Shqipërisë, marrëdhëniet diplomatike midis dy vendeve u lidhën më 19 Gusht, 1991.
Në vitin 2021, eksportet dhe importet midis dy vendeve arritën shifrën 43.44 milionë USD, ndërsa në vitin 2022 arritën shifrën e 53.66 milionë USD, duke paraqitur një trend rritës dhe premtues për rritje të mëtejshme në të ardhmen.
Shqipëria eksporton drejt Izraelit kryesisht pëlhurë, bojëra, vaj, fara, fruta dhe grurë (prodhime bujqësore).
Izraeli eksporton drejt Shqipërisë kryesisht prodhime kimike, pajisje teknike/mjekësore, dhe plastikë.
Izraeli shquhet si një ndër ekonomitë më të qëndrueshme në botë, me një fokus të veçantë në teknologji. Në vitin 2022, rritja e PBB së Izraelit u rrit me +6.1%, ndërsa inflacioni shënoi 4.5%. PBB e Izraelit projektohet të rritet me +2.9% deri në fund të vitit 2023 dhe me +3.3% deri në vitin 2024.
