Rishikimi dhe takimet e përbashkëta në fushën e bioekonomisë
Në kuadër të Projektit “Bioekonomia me bazë kërkimin dhe inovacionin – BIOECO R.D.I”, Dhoma e Tregtisë dhe Industrisë Tiranë organizoi më 12 Nëntor 2019 në Hotel Tirana International në Tiranë “Eventin Ndërkombëtar për Rishikimin dhe Takimet e Përbashkëta”. Pjesëmarrës në këtë aktivitet ishin partnerët e huaj të projektit BIOECO R.D.I dhe aktorë kryesorë të bioekonomisë si përfaqësues të lartë nga ministritë, akademia dhe OJQ-ve.
Qëllimi i këtij aktiviteti ishte:
• prezantimi i situatës së bioekonomisë në të gjithë rajonin në përgjithësi dhe Shqipërinë në mënyrë të veçantë për sektorin e vajit të ullirit, përpunimit të drurit dhe pularive.
• ndarja e përvojave dhe mësimeve me vendet partnere të projektit: Itali, Shqipëri, Serbi, Greqi, Kroaci, Slloveni.
• nxitja e rrjetëzimit dhe takimeve të përbashkëta ndërmjet pjesëmarrësve
Aktiviteti u hap me fjalët përshëndetëse të Sekretares së Përgjithshme të Dhomës së Tregtisë dhe Industrisë Tiranë Znj. Albana Laknori dhe të Menaxheres së Projektit për Shqipërinë Znj. Elida Boshnjaku. Pastaj u pasua me një prezantim të konceptit të bioekonomisë dhe projektit BIOECO R.D.I nga menaxheri i projektit për SVIL z. Diego Mattioli si dhe prezantimin e projektit PROTECT nga znj. Marina Sereni, Menaxhere projekti. Më pas eventi vijoi me prezantime sipas sesioneve tematike:
• “Roli i sektorit publik në nxitjen e zhvillimit të bioekonomisë” prezantime nga përfaqësues të Ministrisë së Bujqësisë dhe Zhvillimit Rural, Ministrisë së Turizmit dhe Mjedisit.
• “Roli i akademisë dhe qendrave kërkimore në nxitjen e zhvillimit të bioekonomisë” prezantime nga profesorë të akademisë dhe kërkues.
• “Roli i organizatave të biznesit në nxitjen e zhvillimit të bioekonomisë” prezantime nga përfaqësues ekzekutiv të OJQ-ve.
• “Praktikat më të mira në fushën e bioekonomisë” prezantime nga ekspertët e strategjive rajonale për bioekonominë në Shqipëri të hartuara në kuadër të projektit BIOECO R.D.I, për të përmbyllur në fund me prezantimin e një kompanie italiane në fushën e bioekonomisë “Poly4life”.
Prezantimet nxorën në pah situatën e bioekonomisë për sektorët e bujqësisë dhe pylltarisë në veçanti në Shqipëri, potencialet e biomasës, problemet, sfidat dhe mundësitë për zhvillim.
Aktiviteti vazhdoi më pas me rrjetëzim dhe takime të përbashkëta ku u vendosën kontakte, institucionet dhe organizatat vendase dhe të huaja pjesëmarrëse në event u prezantuan me njëra tjetrën, diskutuan mbi interesat e përbashkëta dhe mundësitë për bashkëpunim në linjë me bioekonominë.
