Rritja e kapaciteteve digjitale për mikro-mësimin! Zhvillohet trajnimi online në kuadër të projektit ADDUPT
Më 22 maj 2025, Dhoma e Tregtisë dhe Industrisë Tiranë, në bashkëpunim me organizatën ACT, zhvilloi me sukses një trajnim virtual për zhvillimin e burimeve dixhitale të mikro-mësimit.
Ky aktivitet u organizua në kuadër të projektit ndërkombëtar ADDUPT, i bashkëfinancuar nga Bashkimi Europian, dhe synoi të forcojë kapacitetet e profesionistëve dhe trajnerëve në krijimin dhe përdorimin e formateve të reja të të mësuarit.
Trajnimi u zhvillua në platformën “Zoom” dhe mblodhi 24 pjesëmarrës nga institucione të ndryshme arsimore dhe organizata profesionale.
Gjatë këtij sesioni, pjesëmarrësit u njohën me konceptin e mikro-mësimit, qëllimin dhe përfitimet e tij në procesin e trajnimit dhe edukimit, si dhe u prezantuan me elementët kryesorë që duhet të përmbajë një burim efektiv i mikro-mësimit. U diskutua gjithashtu dallimi mes mikro-mësimit dhe e-mësimit tradicional, si dhe u trajtuan kategoritë dhe teknikat për vlerësimin e mikro-mësimit, përfshirë modelin e njohur të Kirkpatrick.
Pjesë e rëndësishme e trajnimit ishin edhe udhëzimet praktike dhe mjetet dixhitale që mundësojnë krijimin e kuizeve interaktive, sondazheve, materialeve vizuale dhe formularëve për mbledhjen e informacionit. U prezantuan gjithashtu platforma të dedikuara për publikimin dhe shpërndarjen e mikro-leksioneve në formate të thjeshta dhe efikase për përdoruesit.
Gjatë këtij aktiviteti u njoftua edhe nisja e procesit të zhvillimit të 20 burimeve të reja të mikro-mësimit, të cilat pritet të integrohen në kurrikulat e trajnimeve të certifikuara nga institucioni ndërkombëtar ICERT në Greqi. Këto burime do të shërbejnë për përgatitjen e profesionistëve në fushën e Internetit të Gjërave (IoT), një prej sektorëve në rritje të ekonomisë digjitale.
Ky trajnim shënon një hap të rëndësishëm në mbështetjen e zhvillimit profesional dhe rritjes së aftësive digjitale në Shqipëri, si dhe në nxitjen e formave moderne dhe fleksibël të të nxënit që përputhen me kërkesat e tregut europian të punës.
